Vraagstellingspraktyk deur Grondslagfase-onderwysstudente tydens aanbieding van wiskundige probleemoplossing

Abstract

Die navorsingstudie is onderneem om ondersoek in te stel na die voorkoms van vraagstellingspraktyk by Grondslagfase-onderwysstudente tydens die aanbieding van wiskundige probleemoplossing. Die keuse van die navorsingsonderwerp is beïnvloed deur my persoonlike beroepsveld as tersiêre Wiskunde Onderwysdosent vir Grondslagfaseonderwysstudente: Hoe word vraagstellingspraktyk gebruik deur Grondslagfaseonderwysstudente tydens die aanbieding van wiskundige probleemoplossing? Wanneer die navorsingsonderwerp ontrafel word, word drie komponente onderskei, naamlik: aanbieding van wiskundige probleemoplossing, die Grondslagfase-onderwysstudent se rol in hermeneutiek en die voornemende opvoeder se vraagstellingspraktyk. Die navorsingsonderwerp word ondersoek met ‘n geamalgameerde teoretiese lens. Die drie opvoedkundige teorieë wat amalgameer om ‘n kaderlens van beskouing te vorm, is Skemp se Teorie van Verbandhouding, Davis se Teorie van Enaktivisme en Bloom se Hersiene Taksonomie. ‘n Uitgebreide literatuurstudie wat die navorsing fokus in bestaande literatuur, is onderneem. Die verband tussen vraagstellingspraktyk, wiskundige probleemoplossing en die vorming van begrip by die leerder word uitgelig. Die navorsingstudie vergestalt in ‘n gevallestudie. Die spesifieke verskynsel is observeer in die natuurlike omstandighede, deurdat lesaanbiedinge met wiskundige probleemoplossing as fokus deur Grondslagfase-onderwysstudente gedoen is in ‘n graad 1-klaskamer. As deelnemende observeerder het ek die gebruik van vraagstellingspraktyk waargeneem. Data is ingesamel deur observasieblaaie, transkripsies, digitale opnames, lesplanne, individuele vraelyste en ‘n fokusgroep-onderhoud. ‘n Kwalitatiewe ondersoek met ‘n interpretatiewe paradigma is onderneem. Ryk, kwalitatiewe data is ingesamel. Die verkose navorsingsmetodologie het my gelei tot data-analisering deur die proses van kodering, kategorisering en tematisering. Die verskynsel word beskryf deur die gebruik van woordbeelde. Die verifikasie van data het maksimale aandag geniet deur triangulasie. Etiese riglyne is getrou gevolg en verseker die verantwoordbaarheid van die ondersoek. Alhoewel internasionale en nasionale literatuur die belangrikheid van vraagstelling beklemtoon om leerders te begelei tot begrip op hoëvlak-denke, word die vaardigheid om dit toe te pas in wiskundige probleemoplossing nie noodwendig ingebou in opleidingsprogramme vir onderwysstudente nie. Studente is bewus van die rigtinggewende rol wat vraagstelling tydens wiskundige probleemoplossing speel, maar is onseker oor die toepassing van gewenste vraagstellingspraktyk tydens lesaanbiedinge. Die gebruik van

effektiewe vraagstellingspraktyk tydens die aanbieding van wiskundige probleemoplossing moet eksplisiet onderrig word aan Grondslagfase-onderwysstudente.